सप्तरी (फत्तेपुर)। प्रधानमन्त्री केपी शर्मा ओलीले प्रतिनिधिसभा विगठन गरेपछि उक्त कदमविरुद्ध सडक आन्दोलन केन्द्रित भएको छ ।
प्रतिनिधिसभा विघटनको विरोधमा नागरिक समाजले माइतीघर मण्डलामा प्रदर्शन गरेका छन् । ‘प्रतिगमन विरुद्ध बृहत् नागरिक आन्दोलन’को ब्यानरमा शनिवार भएको प्रदर्शनमा सहभागीहरूले प्रतिनिधिसभा विघटनको विरोध गरेको हो ।
आन्दोलनका कार्यक्रम अनुसार पुस १३ मा मा डम्फु एपिसोड, पुस १५ मा धिमे एपिसोड, पुस १७ मा च्याब्रुङ एपिसोड र पुस १८ मा सडक नाटकसहित सभा गरिने कार्यक्रम तय भएका छन् । माइतीघर मण्डलामा शनिवार आयोजित शंख एपिसोडमा प्रधानमन्त्री ओलीले प्रतिनिधिसभा विघटन गरेर प्रतिगमन ल्याएको विरोधमा शंख बजाएर प्रदर्शन गरिएको थियो । प्रतिनिधिसभा पुनःस्थापना भएर जनताको सार्वभौम अधिकार जनतामै नफर्किएसम्म आन्दोलन गर्दै जाने नागरिक अगुवाहरूले बताएका छन् ।
कार्यक्रममा राष्ट्रिय मानवअधिकार आयोगकी पूर्वसदस्य मोहना अन्सारी, प्राध्यापक बालकृष्ण माबुहाङ, लेखक तथा पत्रकार नारायण वाग्ले लगायतले प्रधानमन्त्री ओलीको कदमलाई प्रतिगमनको संज्ञा दिँदै प्रतिनिधिसभा पुनःस्थापना हुनुपर्ने माग गरेका थिए । यस्तै उनीहरूले विद्यमान समस्याको समाधान संविधानभित्रैबाट खोज्न सुझाएका छन् । पुस १८ गतेसम्म दिन बिराएर प्रदर्शन गर्ने नागरिक आन्दोलनले जानकारी दिएको छ ।
प्रधानमन्त्री ओलीलाई पार्टी अध्यक्ष र संसदीय दलको नेताबाट कारबाही गरेसँगै प्रचण्ड–नेपाल नेतृत्वको नेकपाले ओलीविरुद्ध देशव्यापी आन्दालनको घोषणा गरिसकेको छ । नेकपाले शुक्रवार पत्रकार सम्मेलन नै गरेर आन्दोलनका कार्यक्रम घोषणा गरेको आजको आर्थिक अभियान दैनिकमा खवर छ ।
तपाईको प्रतिक्रिया