काठमाडौँ । पाठ्यक्रम विकास केन्द्रका महानिर्देशक केशव दाहालले विद्यालय तहका सबै कक्षामा नयाँ पाठ्यक्रम कार्यान्वयन हुने जानकारी दिएका छन् ।
सर्वोच्च अदालतले पुस २८ गते नयाँ पाठ्यक्रम लागू गर्न सरकारलाई बाटो खोलिदिए संग आगामी २०८० सालसम्ममा विद्यालय तहका सबै कक्षामा नयाँ पाठ्यक्रम चरणबद्ध रूपमा कार्यान्वयन हुने उनले बताएका हुन् ।
विद्यालय तहमा चरणबद्ध रूपमा नयाँ पाठ्यक्रम लागू गर्ने योजनाअनुरूप चार वर्षभित्रै सबै कक्षामा नयाँ पाठ्यक्रम कार्यान्वयनमा आइसक्ने दाहालले जानकारी दिएका छन् ।चालू शैक्षिक सत्रमा कक्षा १ र ११ मा नयाँ पाठ्यक्रम लागू भइसकेको उनले बताए ।
केन्द्रका अनुसार २०७८ को शैक्षिक सत्रमा कक्षा २, ३, ६ र १२ तथा २०७९ सालमा कक्षा ४, ७ र ९ मा नयाँ पाठ्यक्रम कार्यान्वयन गरिनेछ । त्यस्तै २०८० सालमा कक्षा ५, ८ र १० मा नयाँ पाठ्यक्रम लागू गरिएपछि विद्यालय तहका सबै कक्षामा नयाँ पाठ्यक्रम कार्यान्वयनमा आइसक्ने उनले बताए । एकै पटक लागू गर्दा पाठ्यक्रम निर्माण, पाठ्यपुस्तक प्रकाशन लगायतका काम गर्न समस्या हुने भएकाले चरणबद्ध रूपमा कार्यान्वयनमा लैजाने लक्ष्य राखिएको पनि बताए ।
तपाईको प्रतिक्रिया