सुर्खेत । लागुऔषध ब्राउन सुगरसहित सासू-बुहारी पक्राउ परेकी छन् ।
जिल्ला प्रहरी कार्यालय सुर्खेतले विशेष सूचनाका आधारमा लागुऔषध ब्राउन सुगरसहित राजधानी वीरेन्द्रनगरबाट सासू–बुहारीलाई पक्राउ गरेको हो ।
जिप्रका सुर्खेतका प्रहरी नायब उपरीक्षक रामप्रसाद घर्तीले जानकारी दिएअनुसार पक्राउ पर्नेमा वीरेन्द्रनगर-८ सुर्खेत इत्रामखोला नजिक बस्ने २४ वर्षीया बुहारी शान्ति सिंहसहित उनकी सासू कौशिला सिंह रहेकी छन् ।
मङ्गलबार उनीहरुलाई सार्वजनिक गर्दै प्रहरी नायब उपरीक्षक घर्तीले १४ ग्राम ९७० मिलिग्राम लागुऔषधसहित सासू–बुहारीलाई पक्राउ गरिएको बताएका छन् । लागुऔषधसहित शान्ति सिंहको साथमा रहेको रु २१ हजार ५०० नगद पनि बरामद गरिएको प्रहरी नायब उपरीक्षक घर्तीले बताए ।
सासू–बुहारीलाई लागुऔषध खरिद, ओसारपसार, सञ्चय तथा बिक्री वितरण गरेको सम्बन्धमा अनुसन्धान भइरहेको जनाएको छ ।
तपाईको प्रतिक्रिया